બર્ગર ખાવાના શોખીન લોકોમાં વિશ્વની પ્રખ્યાત ગ્લોબલ બ્રાન્ડ McDonald’s આ દિવસોમાં ચર્ચામાં છે. જો કે આ વખતે કારણ પરેશાન કરનાર છે. યુ.એસ. સેન્ટર્સ ફોર ડિસીઝ કંટ્રોલ (CDC) અનુસાર, E. coli નામના બેક્ટેરિયાએ અમેરિકાના 10 રાજ્યોમાં હલચલ મચાવી છે. દૂષિત મેકડોનાલ્ડ્સ હેમબર્ગર ખાવાથી એક વ્યક્તિનું મૃત્યુ થયું છે. અને અન્ય 49 બીમાર પડ્યા છે. E. coli O157 વાયરસથી સંક્રમિત 10 લોકોને હોસ્પિટલમાં દાખલ કરવામાં આવ્યા છે. સીડીસીએ જણાવ્યું હતું કે તમામ અસરગ્રસ્ત લોકોએ મેકડોનાલ્ડ્સમાં ખાધું હતું અને તે પછી તરત જ બીમાર થઈ ગયા હતા.
વાયરસના સ્ત્રોતો વિશે વાત કરીએ તો, વાયરસ લોકો સુધી કેવી રીતે પહોંચ્યો તેની તપાસ કરવામાં આવી રહી છે. આ માટે, સમારેલી ડુંગળી અને તાજી બીફ પેટીસનું પરીક્ષણ કરવામાં આવી રહ્યું છે. જો કે, હજુ સુધી એ જાણી શકાયું નથી કે આ વાયરસ કોનાથી ફેલાય છે. મેકડોનાલ્ડ્સે સાવચેતી રૂપે કોલોરાડો અને નેબ્રાસ્કા સહિતના અસરગ્રસ્ત રાજ્યોના સ્ટોર્સમાંથી સમારેલી ડુંગળી અને બીફ પેટીસ દૂર કરી છે. આ ઘટનાને કારણે મેકડોનાલ્ડના શેર પર ખરાબ અસર પડી રહી છે. માત્ર થોડા કલાકોમાં જ શેર 6% ઘટ્યા. લોકો બીમાર થયા પછી કંપનીએ કોલોરાડો, કેન્સાસ, ઉટાહ અને વ્યોમિંગની રેસ્ટોરાંમાંથી ક્વાર્ટર પાઉન્ડર વિવિધ પ્રકારના બર્ગરને અસ્થાયી ધોરણે દૂર કર્યા છે.
E. coli વાયરસ શું છે?
E. coli (Escherichia coli) એ એક પ્રકારનો બેક્ટેરિયા છે જે સામાન્ય રીતે મનુષ્યો અને પ્રાણીઓના આંતરડામાં જોવા મળે છે. આ બેક્ટેરિયા મોટાભાગના કિસ્સાઓમાં હાનિકારક નથી, પરંતુ કેટલાક પ્રકારો, જેમ કે E. coli O157, ગંભીર બીમારીનું કારણ બની શકે છે. તે શરીરની અંદર ઝેરી પદાર્થો ઉત્પન્ન કરે છે જે પેટમાં ખેંચાણ, ઝાડા અને ઉલ્ટીનું કારણ બની શકે છે. ચેપ સામાન્ય રીતે દૂષિત ખોરાક અથવા પીવાનું પાણી ખાવાથી થાય છે. લક્ષણો સામાન્ય રીતે એક્સપોઝરના ત્રણથી ચાર દિવસ પછી દેખાય છે, જો કે તે એકથી 10 દિવસ પછી શરૂ થઈ શકે છે. નિષ્ણાતોએ ચેતવણી આપી છે કે જેમ જેમ તપાસ આગળ વધશે તેમ તેમ E. coli O157 થી સંક્રમિત વધુ કેસ બહાર આવી શકે છે.
