ચીનમાં એક ભયાનક માર્ગ અકસ્માતમાં 35 લોકોના મોત અને 43 લોકો ઘાયલ થયા છે. કહેવાય છે કે સ્પોર્ટ્સ સેન્ટરમાં હાજર લોકો પર એક વ્યક્તિએ કાર ચલાવી હતી. મળતી માહિતી મુજબ, આ વ્યક્તિ છૂટાછેડા અને ત્યારબાદ મિલકતના ભાગલાથી ખૂબ ગુસ્સે હતો અને ગુસ્સામાં તેણે આ ઘટનાને અંજામ આપ્યો હતો. ચીની અધિકારીઓને આ ઘટનાની પુષ્ટિ કરવામાં લગભગ 24 કલાકનો સમય લાગ્યો હતો. આ અકસ્માતની સોશિયલ મીડિયા પર ખૂબ ટીકા થઈ રહી છે. તે જ સમયે, ચીને સોશિયલ મીડિયા પર નજર રાખવાનું શરૂ કર્યું અને અકસ્માતને છુપાવવાનું શરૂ કર્યું.
પોલીસે આરોપીની ધરપકડ કરી લીધી છે. તે 62 વર્ષીય વ્યક્તિ છે અને તેણે પોતાની જાતને છરી મારીને આત્મહત્યા કરવાનો પ્રયાસ પણ કર્યો હતો. આ વ્યક્તિને હાલમાં હોસ્પિટલમાં દાખલ કરવામાં આવ્યો છે. આ ઘટનાના ફૂટેજ ચીનના સોશિયલ મીડિયા પ્લેટફોર્મ પર વાયરલ થવા લાગ્યા.
આ પછી ચીની સરકારે તેને ઝડપથી સેન્સર કરી દીધું. લોકોની કોમેન્ટ અને હેશટેગ પણ હટાવી દેવામાં આવ્યા છે. મૃત્યુઆંકના આંકડા પણ છુપાવવામાં આવી રહ્યા છે. રાજ્ય મીડિયા બેઇજિંગ ડેઇલી અનુસાર, ઝુહાઇ શહેર અને ગુઆંગડોંગ પ્રાંતમાંથી બચાવ ટીમ તાત્કાલિક સહાય પૂરી પાડવા માટે પહોંચી હતી. પાંચ હોસ્પિટલોના 300 થી વધુ આરોગ્ય કર્મચારીઓ ચોવીસ કલાક કામ કરી રહ્યા છે.
પોલીસે ડ્રાઈવરની ઓળખ 62 વર્ષીય વ્યક્તિ તરીકે કરી છે, જેનું નામ ફેન છે. ઈજાના કારણે તેની ધરપકડ કરવામાં આવી છે અને તેને હોસ્પિટલમાં દાખલ કરવામાં આવ્યો છે. ફેન્સે છૂટાછેડાના કારણે ગુસ્સામાં આ જીવલેણ પગલું ભર્યું. આ અકસ્માતને લઈને ચીનના લોકોમાં શોકની લહેર છે. ઘણા લોકો સ્પોર્ટ્સ સેન્ટર પર પહોંચ્યા અને સ્થળ પર ફૂલ ચઢાવ્યા. કેટલાક ડિલિવરી બોય્સે ત્યાં શ્રદ્ધાંજલિ તરીકે ગુલદસ્તો રાખ્યો હતો.
