મહારાષ્ટ્રના સાંગલી જિલ્લામાં એક કેમિકલ કંપનીમાં ગેસ લીકેજનો મામલો સામે આવ્યો છે. ગેસ લીકેજના કારણે ત્રણ લોકોના મોત થયા છે, જેમાં બે મહિલાઓ પણ સામેલ છે. કહેવામાં આવી રહ્યું છે કે આ એક ફર્ટિલાઇઝર પ્લાન્ટ હતો, રિએક્ટરમાં વિસ્ફોટ થયા બાદ તેમાંથી ગેસ લીક થવા લાગ્યો હતો.
આ ઘટના જિલ્લાના કડેગાંવ તહસીલના શાલગાંવ MIDCમાં આવેલી મ્યાનમાર કેમિકલ કંપનીમાં ગુરુવારે સાંજે લગભગ 6.30 વાગ્યે બની હતી. પોલીસે આ ઘટના અંગે માહિતી આપી છે.
9 હોસ્પિટલમાં સારવાર હેઠળ છે
પોલીસે જણાવ્યું કે ખાતરના પ્લાન્ટમાં રિએક્ટરમાં વિસ્ફોટ થયો, જેનાથી રાસાયણિક ધુમાડો નીકળ્યો. કડેગાંવ પોલીસ સ્ટેશનના વરિષ્ઠ નિરીક્ષક સંગ્રામ શેવાલેએ જણાવ્યું હતું કે ગેસ લીક થવાને કારણે યુનિટમાંથી લગભગ 12 લોકોને અસર થઈ હતી અને તેમને હોસ્પિટલમાં લઈ જવામાં આવ્યા હતા. જેમાંથી બે મહિલા કર્મચારીઓ અને એક સુરક્ષા ગાર્ડના મોત થયા છે. અન્ય નવને સારવાર આપવામાં આવી રહી છે.
શું હતો સમગ્ર મામલો?
જે બે મહિલાઓએ જીવ ગુમાવ્યો તેમની ઓળખ સાંગલી જિલ્લાના યેતગાંવની 50 વર્ષીય સુચિતા ઉથલે અને સતારા જિલ્લાના મસુરની 26 વર્ષીય નીલમ રેથ્રેકર તરીકે કરવામાં આવી છે, એમ અધિકારીએ જણાવ્યું હતું. સાંગલીના પોલીસ અધિક્ષક સંદીપ ઘુગેએ જણાવ્યું કે ગેસ એમોનિયા હોવાની શંકા છે.
આ પહેલા મહારાષ્ટ્રના પાલઘર જિલ્લામાંથી એક સમાચાર સામે આવ્યા હતા. ત્યાં એક કેમિકલ ફેક્ટરીમાં લાગેલી આગમાં છ કર્મચારીઓ ઘાયલ થયા છે, જેમાંથી ત્રણની હાલત ગંભીર છે. ડિસ્ટ્રિક્ટ ડિઝાસ્ટર મેનેજમેન્ટ સેલના વડા વિવેકાનંદ કદમે ઘટનાની માહિતી લીધી હતી અને જણાવ્યું હતું કે બપોરે 12 વાગ્યે ફેક્ટરીના એક ભાગમાં આગ લાગી હતી. પ્રાપ્ત માહિતી અનુસાર ફાયર બ્રિગેડ ઘટના સ્થળે પહોંચે તે પહેલા જ ફેક્ટરીના કામદારોએ આગ પર કાબૂ મેળવી લીધો હતો.
