ભારતીય ક્રિકેટ ટીમ અને ઓસ્ટ્રેલિયન ક્રિકેટ ટીમ વચ્ચે ચોથી ટેસ્ટ મેચ મેલબોર્નમાં રમાઈ રહી છે. ભારતીય કેપ્ટન રોહિત શર્માએ આ બોક્સિંગ ડે ટેસ્ટની પ્રથમ ઇનિંગમાં 3 રન બનાવ્યા હતા. આ શ્રેણીમાં રોહિતનું અત્યાર સુધીનું પ્રદર્શન શરમજનક રહ્યું છે અને તેણે માત્ર 22 રન જ બનાવ્યા છે. આવી સ્થિતિમાં રોહિત શર્માની નિવૃત્તિની માંગ ઉઠવા લાગી છે.
રોહિત થઈ શકે છે નિવૃત્ત
દરમિયાન, એવી આશંકા છે કે રોહિત બોર્ડર ગાવસ્કર ટ્રોફી પછી નિવૃત્તિની જાહેરાત કરી શકે છે. પીટીઆઈના અહેવાલમાં કહેવામાં આવ્યું છે કે શક્ય છે કે રોહિત વર્તમાન શ્રેણી પછી ટેસ્ટમાંથી નિવૃત્તિ લઈ શકે. રિપોર્ટ અનુસાર ચીફ સિલેક્ટર અજીત અગરકર હાલમાં મેલબોર્નમાં છે અને શક્ય છે કે તે રોહિતના ભવિષ્ય વિશે ચર્ચા કરશે.
સિરીઝ 1-1 થી બરાબર છે
રિપોર્ટ અનુસાર, જો ભારતીય ટીમ વર્લ્ડ ટેસ્ટ ચેમ્પિયનશિપની ફાઇનલમાં નહીં પહોંચે તો રોહિત ટેસ્ટમાંથી સંન્યાસ લઇ શકે છે. બોર્ડર ગાવસ્કર ટ્રોફી હાલમાં 1-1 થી બરાબર છે. ભારતે પ્રથમ ટેસ્ટ જીતી હતી. બીજી મેચમાં કાંગારૂ ટીમનો વિજય થયો હતો. ગાબા ખાતે રમાયેલી ત્રીજી ટેસ્ટ ડ્રોમાં સમાપ્ત થઈ હતી. આવી સ્થિતિમાં ભારત માટે આગામી 2 ટેસ્ટ મહત્વની છે.
રોહિતે બેટિંગ ક્રમમાં ફેરફાર કર્યો
બોર્ડર ગાવસ્કર ટ્રોફીની ચોથી ટેસ્ટમાં ભારતના પ્લેઈંગ 11માં એક ફેરફાર કર્યો છે. શુભમન ગિલની જગ્યાએ વોશિંગ્ટન સુંદરને તક આપવામાં આવી છે. આટલું જ નહીં રોહિત શર્માએ બેટિંગ ઓર્ડરમાં પણ મોટો ફેરફાર કર્યો છે.
બીજી અને ત્રીજી ટેસ્ટમાં છઠ્ઠા નંબર પર બેટિંગ કરનાર રોહિત મેલબોર્ન ટેસ્ટમાં ઓપનિંગ કરવા આવ્યો હતો. બીજી તરફ કેએલ રાહુલને ત્રીજા નંબરે રાખવામાં આવ્યો હતો. રોહિત શર્મા પણ ઓપનિંગમાં નિષ્ફળ રહ્યો હતો. બીજી તરફ કેએલ રાહુલના બેટિંગ ક્રમમાં ફેરફાર બાદ તે પણ નિષ્ફળ રહ્યો હતો. રાહુલે 42 બોલમાં 24 રનની ઇનિંગ રમી હતી.
