ભારતીય ટીમના કાર્યકારી કેપ્ટન જસપ્રિત બુમરાહે શુક્રવારે પર્થમાં પોતાના વિનાશક બોલથી ઓસ્ટ્રેલિયાના બેટ્સમેનોને દંગ કરી દીધા હતા. બુમરાહે પોતાની ઘાતક બોલિંગથી ઓસ્ટ્રેલિયાના ટોપ ઓર્ડરને ધ્વસ્ત કરી નાખ્યો હતો.
બુમરાહે ઓસ્ટ્રેલિયન ઇનિંગ્સની ત્રીજી ઓવરમાં ઓપનર નાથન મેકસ્વીની (10)ને LBW આઉટ કરીને ભારતને પ્રથમ સફળતા અપાવી હતી. આ પછી તેણે ઇનિંગની સાતમી ઓવરમાં સતત બે બોલમાં બે વિકેટ લઈને કાંગારૂ ટીમને બેક ફૂટ પર ધકેલી દીધી હતી. બુમરાહે ઓવરના ચોથા બોલ પર બીજી સ્લિપમાં ખ્વાજાને વિરાટ કોહલીના હાથે કેચ આઉટ કરાવ્યો હતો. બીજા જ બોલ પર બુમરાહે સ્ટીવ સ્મિથને LBW આઉટ કર્યો હતો.
બુમરાહની ઓવરનો પાંચમો બોલ ઓફ સ્ટમ્પની બહારથી અંદરની તરફ સ્વિંગ કરતો આવ્યો, જે સીધો સ્મિથના પેડ પર ગયો. ભારતીય ટીમની જોરદાર અપીલ પર અમ્પાયરે જરા પણ વિલંબ કર્યા વગર આંગળી ઉંચી કરી હતી. સ્મિથ ગોલ્ડન ડક પર આઉટ થયો હતો. તમને જણાવી દઈએ કે ક્રિકેટની ભાષામાં પહેલા જ બોલ પર આઉટ થનાર બેટ્સમેનને ગોલ્ડન ડકનો શિકાર કહેવામાં આવે છે. જમણા હાથના બેટ્સમેનને પણ ખબર હતી કે તે સ્પષ્ટ રીતે આઉટ છે, તેથી તે રિવ્યુ લીધા વિના પેવેલિયન પરત ફર્યો.
બુમરાહની ખાસ સિદ્ધિ
જસપ્રીત બુમરાહે સ્ટીવ સ્મિથને આઉટ કરીને ખાસ સિદ્ધિ પોતાના નામે નોંધાવી હતી. સ્ટીવ સ્મિથને ગોલ્ડન ડક પર આઉટ કરનાર બુમરાહ ટેસ્ટ ઈતિહાસનો બીજો બોલર બન્યો. આ પહેલા દક્ષિણ આફ્રિકાના પૂર્વ ફાસ્ટ બોલર ડેલ સ્ટેને 2014માં પોર્ટ એલિઝાબેથમાં પ્રથમ બોલે જ સ્મિથને આઉટ કર્યો હતો.
ઑસ્ટ્રેલિયાનું દુઃખ
બુમરાહની ધારદાર બોલિંગ બાદ હર્ષિત રાણા અને મોહમ્મદ સિરાજે ટ્રેવિસ હેડ અને મિશેલ માર્શને પેવેલિયન મોકલીને ઓસ્ટ્રેલિયા માટે મુશ્કેલી ઊભી કરી હતી. ઓસ્ટ્રેલિયાએ માત્ર 38 રનના સ્કોર પર 5 વિકેટ ગુમાવી દીધી હતી. 1980 પછી આ બીજી વખત છે જ્યારે કાંગારૂ ટીમે ઘરઆંગણે 40 રનના સ્કોર પહેલા પાંચ વિકેટ ગુમાવી દીધી હતી. આ સિવાય 2016માં દક્ષિણ આફ્રિકા સામે હોબાર્ટમાં કાંગારૂ ટીમે 17 રનમાં પાંચ વિકેટ ગુમાવી દીધી હતી. સમાચાર લખાય છે ત્યાં સુધી ઓસ્ટ્રેલિયાએ 48 રનમાં 6 વિકેટ ગુમાવી દીધી છે.
ભારત 150 રને ઓલઆઉટ
તમને યાદ અપાવી દઈએ કે પર્થના ઓપ્ટસ સ્ટેડિયમમાં રમાઈ રહેલી મેચમાં ભારતીય ટીમના કેપ્ટન જસપ્રિત બુમરાહે ટોસ જીતીને પહેલા બેટિંગ કરવાનો નિર્ણય કર્યો હતો. જોશ હેઝલવુડ (4 વિકેટ) અને અન્ય બોલરોના શાનદાર પ્રદર્શનની સામે ભારતીય ટીમનો પ્રથમ દાવ 150 રનમાં સમેટાઈ ગયો હતો. મુલાકાતી ટીમ માટે નવોદિત નીતીશ કુમાર રેડ્ડી (41) શ્રેષ્ઠ સ્કોરર રહ્યો હતો.
